فارس الأحلام
ده بيتحول أحيانًا لعدو أكبر للسعادة
المشكلة إن كلنا فينا الداء المهبب ده .. أيوالله مهبب
نقعد نفصل بني آدم علي مزاجنا و نستناه و يطلع زي ما يطلع
بعين واحدة برجل مسلوخة أهو زي ما ييجي معانا
طيب من غير مقاوحة فكروا كدة معايا بعقلكم
هو فيه بني آدم في الدنيا كلها تفصيل؟؟
و لو حتي متفصل إنت اللي فصلته و لا ربك اللي مفصله
يعني معلش لو إحنا شاطرين و عملنا بني آدم لنفسنا نحبه
يا تري حضراتنا حددنا عيوبه؟
حأقولكم إيه مشكلة فارس الأحلام معايا
فارس الأحلام ده هو مجرد تنفيس عن الحرمان فينا
ما هو كلنا قبل ما نحب عايزين نحب
فنقوم نعمل إيه نتخيل
علي فكرة أنا مش ضد الخيال أنا مشكلتي في الصدمة بتاعة الواقع
نفترض إن فارس الأحلام ده بتفاصيله كلها لقيته بشحمه و لحمه قدامي
طبعًا حيجيلي بري بري و أنا عايزة من ده يا حزمبل أنا عايزة من ده
و قابل بقي يا عم
يطلع فيه العبر و عيوب معملتش حسابها
و الخيال يدمر و الصدمة تقضي عليا و علي عشرة معايا
و يمكن أتعقد أو أكره الحب و اللي جابوه
واحد حييجي يقوللي يعني إنتي بقي عايزة إيه منحلمش و منتخيلش
و ميبقالناش مواصفات محددة نختار علي أساسها؟
يتقطع لساني لو قلت كدة
يا عم إصبر علي رزقك
أنا بس عايزة أقول حاجة الناس مش تفصيل
و لو حتي تفصيل لازم نعمل حساب الديفوهات
و منحصرش نفسنا في كدبة خلقها عقلنا و عاش فيها
ساعات كتير قوي أسمع فلان الفلاني ييجي يقوللي
أنا قابلت واحدة مفيهاش أي صفة من اللي أنا عايزه
بس حقيقي سعيد معاها و حاسس إني بحبها
أرد أنا ببراءة: طيب يا عم و فيها إيه متحبها فين المشكلة
الأخ يتنرفز و يقوللي: مبتفهميش و لا إيه؟
ما بقولك بس مفيهاش حاجة من اللي عايزها
فأسأل أنا بإستغراب: طيب يا سيدي مش إنت سعيد؟
يرد بأسي: أه فعلا سعيد
فأشمت فيه بقي و أقولله: طيب يا عم الفالح مين فينا اللي مبيفهمش
و تيجي أختنا الحلوة عايزة و عايزة و عايزة و يبقي طويل و عريض و مفتول
أتخنق أنا من البنات دي و أقولها بفرسة: إيه يا بنتي ركزي هي كانت وظيفة؟
ما هو معلش متزعليش أنا شايفة إنك مش بتختاري شريك حياة
لا ده حضرتك بتختاري سي في و محددالي شروط
يعني يا ست الكل وقعتي و طبيتي في غيره
و ماله إن شالله يطلع من غير مؤاخذة كدة عفريت و لا أبو رجل مسلوخة
أهو قدرك و حبتيه
مفكرتوش يوم إن اللي ممكن يسعدك حاجة إنت نفسك متعرفهاش عن نفسك
و يمكن إنت مش عارف حقيقي مين اللي لو معاك حياتك حتبقي أحلي
و يمكن فارس الأحلام ده يقضي عليك لإنه فيه عيوب قاتلة
محدش فينا كامل و لا إنت كمان
و لما تحدد تفاصيل إعرف إنه فارس أحلامك ده
خياله فيه فارس أحلامه برضه بكل تفاصيله و يمكن ميكونش إنت
و يمكن يا عم البني آدم التفصيل يتوجد
و تبقي عيوب شخصيته تقدر تعيش معاها كلها إلا عيب واحد إنه هو ميحبكش
يا ريت لما نحلم منبوظش الواقع بتاعنا عشان فكرة
و ندي فرصة لنفسنا أكتر و نعرف إن ممكن السعادة تجيلك من حيث لا تحتسب
و إفتكروا الكلمة دي من حيث لا تحتسب
و اللي مفيهوش و لا صفة من فارس أحلامك
ممكن يبقي الوحيد اللي تعيش معاه مرتاح و تحبه لدرجة العشق
فارجموا فارس الأحلام لو قابلتوا الحب الحقيقي في حد مش شبهه
و علي رأي المثل: اللي متاخدوش القرعة تاخدوا أم الشعور
الأربعاء فبراير 17, 2021 11:04 pm من طرف موسى جاد
