المبادرة الشعبية لدعم لولو

المبادرة الشعبية أوى لدعم "لولو" للترشح للرياسة

--------------------------------------------------------------------------------

جروب جديد على الفيس بوك بس نكتة


بعد انتشار المبادرات الشعبية الالكترونية التى تنادى بدعم أشخاص بعينها للترشح للرئاسة ، البرادعى و عمرو موسى و عمرو خالد و أحمد زويل و على جمعة ( على جمعة ؟! ) و ناس تانية غريبة جدا منهم مدرس رياضيات ( آيوة زى ما قريت كدة ) ، و منهم مدير شركة مجهولة و اللى عامله الجروب واحدة موظفة عنده ( على سبيل العِشرة يعنى ) ، و الحكومة قاعدة ساكتة و محدش فاهم أى حاجة ، قررنا أن نطلق هذا الجروب المبارك ليكون شرارة الحملة الشعبية الأولى لترشيح لولو لرياسة بلدنا الحبيب بل و انتخابه أيضا فهو ليس أقل من أى واحد عاوز يترشح و هذا للأسباب الآتية ، قصدى لل تلاتييييييييييين سبب الآتى حتى نسكت أفواه الكائدين و الكائدات و نجعل كل من يشكك فى نزاهة لولو و جدية لولو و شعر لولو ، نجعله خاسئا خاسرا بإذن الله



لماذا لولو ؟


نحن نرشح لولو للأسباب الآتية :


1- دكر إن شاء الله


2- فى الخامس عشر من يناير 2010 سيتم ال 18 ، يعنى سن قانونى ، يعنى ممكن يتجوز فيه ، يعنى حيظبط الشعب ، أينعم لازم يتم سن 21 سنة عشان يجيب مشروبات روحية قذرة و غير روحية قذرة برضو من درينكيز ، بس حيتصرف و يظبط الشعب


3- لولو بيزعل ، و دا سبب كافى لاتقاء شره لو ما اترشحش ( راجع الأجزاء من واحد إلى 15 من السلسلة المشهورة )


4- شعره ناعم ، يعنى حيكون مثال جيد فى وسائل الاعلام على مدى رجولة رجال الحكم فى بلدنا الحبيب


5- الدقة الشديدة و الذكاء الخارق فى اختيار ألوان بوكسراته ، فإذا دققنا جيدا ، فنرى أن ألوان بوكسراته دائما تعبر عن بيئة البلد و عن ألوان البلد العظيم ، فالأزرق يعبر عن العمال و الأحمر عن شارع الهرم و الأخضر لون النيل الملوث و الأصفر لون الشعب ، و هذا يثبت أنه " محتكا" بجميع أطياف الشعب ليل نهار


6- عنده بطاقة متاخدتش لحد دلوقت ، يعنى ماشى نضيف و حيعرف يبنتخب نفسه


7- معندوش بازابورت ، يعنى قاعدلنا و لازق جنبنا ، مش حيبسيبنا و يهج


8- خبرة بقيادة جميع أنواع السيارات ، بدءا من ال 126 و حتى ال 128


9- خبرة بجميع أنواع الأسلحة ، بدءا من القصافة إلى الفازة الإزاز اللى جنب باب بيتهم


10- خبرة يجميع أنواع المزاج و الكيف ، سواء دماغ بوابين ( حشيش – بوظة ) أو دماغ ولاد الذوات ( بودرة و كيماوى و أى دى ) ، و هذا يثبت قطعا أن لولو ينوى تظبيط جميع الطبقات ، حيث ينوى من منطلقاته الاشتراكية أن يساوى بين الطبقات فى الدماغ العالية ، عشان الشعب كله يرفرف معاه نحو آفاق جديدة من التنمية المستدامة و سعر الفائدة و الفائض


11- بيحب منير ، يا عذاب النفس


12- ألدغ ، و الشعوب تحب اللدغاء ، فماذا استفدنا من حكام ظلمة ينطقون حرف الراء بشكله الصحيح ؟ هاه ؟


13- بيحب هتلر ، حيطلع بوز أبو اليهود يعنى


14- لسانه أطول منه بمترين و نص ، فنحن فى حاجة الى لولو لانه صايع مِخَلَّص عارف اللى فيها
15- انسان كويس


16- بيحب الأفلام العربى ، و ساعات بيعيط لما عماد حمدى ينقذ فاتن حمامة لما جزمتها تتحشر فى القضيب ، قضيب القطر ، و القطر أصلا فى مدينة تانية ، بس هو حينقذها و خلاص ، عشاان الناس تروح ، و لولو يعيط فى الآخر ، انسان انسان يعنى


17- يؤمن بالوحدة الوطنية و شاكيرا


18- زملكاوى حتى النخاع ، و هى حقيقة علمية ، فبعد ماتش ال ستة واحد إياه ، دخل لولو فى طور اكتئاب لأسابيع ، لم يخرجه منه سوى صديقه الخيالى " بكار " الذى حثه على الخطيئة و شرب السجاير و البيات على القهاوى .


19- أبو كف رقيق و صغير


20- بيحب الخرشوف زى عينيه ، نفسه الدنيا كلها تبقى خرشوف ، و هو يأكله فى جميع حالاته ، مسلوقا و محشيا و محمرا و مشويا بل و حتى ساندويتشا (اعععع ) و هى أكلة لا يقدر عليها سوى الرجال و الرجال فقط ، بل و يريد تحويله ليكون المحصول الرسمى للجمهورية بعد الكوسة


21- خبير بالكيمياء الحيوية و الخايروبيولوجى، مما يبشر بسرعة حل مشكلة الصرف الصحى فى البلد و هذا بتعميم الحمامات البلدية فى البلاد ( حفرة فى الأرض يعنى ) بدل الافرنجية اللى مش بتعمل حاجة و بتسد المواسير ، خلى الشعب حر و سعيد كل ما يتزنق يقلع فى أى حتة ، دى بلدك و انتا حر فيها ، مصر بتاعتك و بتاعتى


22- إذا مسك لولو الحكم ، فيعدكم بتركيب ميكروفونات على كل عامود ، و فى كل حارة و فى كل قرية ، و يذيع أغانى منير يوميا على مدار الأربعة و ستين ساعة


23- إذا مسك لولو الحكم ، فيعدكم بتغيير الزى الشعبى إلى المايوة السبيدو بالنسبة للرجال ، و المايوة القطعتين بالنسبة للنساء ( شبشب و كاب )


24- إذا مسك لولو الحكم ، فسيقطع كل علاقاتنا بأى دولة أو اى حارة جنبنا ، عشان احنا زهقنا بصراحة ، و البلد حترفع شعار عيش و سيبنى أعيش


25- إذا مسك لولو الحكم ، فسيعدم الألاشين و الألاشات ، و هذا منعا لانقطاع النسل فى البلد و تشجيع الشعب على التوالد بحرية من دون أى عوائق خارجية


26- إذا مسك لولو الحكم ، فيعد كل مواطن بوان ماك تشيكن كومبو يوميا من ماكدونالدز (برابابابا ، أنا أحبه ) ، و هذا لتذكير الشعب بحبه الشخصى لهذه الوجبة تحديدا أيام الثانوية العامة ، لتكون هذه الوجبة هى الأكلة الشعبيةالأولى بدلا من الأكلة البيئة اللى اسمها الفول ( ياى )


27- إذا مسك لولو الحكم ، فسيلغى الدستور و لن يضع واحد مكانه ، كان عملنا ايه الدستور يعنى بذمتك ؟؟ ، و كمان حيلغى معظم الوزارات اللى مالهاش لزمة زى وزارة التنمية المحلية ( هاه ؟ ) و وزارة التضامن الاجتماعى ذات الشعار الاباحى جدا ( خمسة بيحضنوا بعض )


28- إذا مسك لولو الحكم ، يعدكم بنشر شبكة واى فاى للبلد كلها ، و أى واحد أجنبى لما يدخل لازم يدفع عشان ياخد الباسوورد بس على الله محدش من الدول اللى جنبنا تخش على النتوورك بتاعتنا


29- إن لولو من الناس التى تؤمن بالقومية العربية ، فهو يحب نانسى و هيفاء و اليسا ( لبنان ) و أصالة ( سوريا ) و نبيلة عبيد ( مصر ) ، و درة ( تونس ) و غيرهن و غيرهن، فحبه للنساء الجميلات يمتد من المحيط للخليج ، فما فرقته السياسة جمعته روتانا


30- يوجد لدى لولو حكمة مأثورة " أم الحكومة ، أم الشيطان ، أم الأهلاوية " ، و هو بهذا قد جاب من الآخر و أفصح عن توجهاته ، فهو دائما منحاز للخير حتى لو كان يخسر فى بعض الأحايين ( راجع نتائج المعارضة و نتائج الزمالك )



اطبعوا صور لولو على كل شريط كاسيت و سى دى ، ارسموها على العمارات ، على جدران الحمامات العامة ، اكتبوا حِكَم لولو المأثورة على كل بيت فى مصر ، اهتفوا باسمه فى الشوارع ، اهتفوا بسبابه الشهير المكون من ثلاثة احرف فقط لا غير ، قصوا شعركم على طريقته ، و حاولوا أن تنطقوا حرف الراء بطريقة غير صحيحة ، لتكن الثورة و يترشح لولو للرياسة و كله يكون فى الأليصطة ، و أنا وانتا بنحبك يا تا.. آ .. يا لووووووولووووووو

قصيدة في حب اللولو فى عيد ميلاده


كل سنة
زي النهارده
العالم يهديك ألف وردة
ياللي انت اللي بين ايديك
دهب
بين ايدينا خرده
و لا يهمك من أعاديك
دي عالم مخها صدى
و لا تسأل فيهم
و النعمة دي عالم باردة
***
اليوم خمستاشر
الشهر يناير
اتولد اللي هينزل الدعم على السجاير
اتولد اللي هيلبس طرح
للجزاير
اتولد أجمل ناير
و طريقي داير دواير
يا حلوة يا أم الضفاير
-معلش اندمجت-
و يقولوا ده عيد ميلاد ناصر
و ايع ييجي جنبك ناصر
في أي رهان
أكيد هو اللي خاسر
***
من طلعتك البهية
حتى الشمس اتكسفت
يا لولو ياللي بميلادك
كل الموازين اتعكست
يا لولو ياللي في بعادك
حالة البلد اتوكست
وراك و بنحبك
و سايرين على دربك
وراك لحد الآخر
يا أجدع زعيم من الآخر
بلا أحمس بلا ناصر
ده لولو سحره آسر
اسمحلي أحييك و بشدة
كل سنة زي النهارده
العالم يهديك ألف وردة
__________________