يوميات النائب

موضوع: يوميات النائب الإثنين مايو 24, 2010 12:41 pm

يوميات النائب
نفسى .. أرشح نفسى ... يوم للبرلمــــــــــــــــــــــان
وامشى عامل فى البلد دى ... مهرجــــــــــــــــــــان
واليفط بالاسم .ز فوق كل الحيطــــــــــــــــــــــــــان
فى كل حــــارة .. وكل شــــارع .. أو ميــــدان
وأدور ألـــف على القهــــــاوى فى هيلمـــــــــــــان
والكل يهتف .. " عاش فلان .. عاش فــلان "
والزفة تخرج من صوان .. تدخل صــــــــــــوان
وأنا أفضل اخطب .. لما أولَّع فى المكـــــــــــان
*****
واشتم اللى مرشحين روحهم قصادى
والعن الوضع الســــــياسى ولاقتصـــــــــــــــادى
دى الحكومة فى وادى ... وانتو ياناس فى وادى
بس وعليَّه الطلاق .. وحيــــــــــــــــاة ولادى
مــــش حيفــــــلت حـــد مــن أيـــــدى النوبة دى
الرغيف حيكون بنكلة .. وبالزبــــــــــــــــــادى
والرخـــــــــاء لازم يعشش فوق بـــــــــــــــلادى
كل عَيِّل والنبى .. لا فتح له نـــــــــــــــــــادى
*** **
واللى ســـاكن شـقـة تبـــقى مكتوبــه لــــــــــــه
والمرتب تصرفه .. تقبــض بدالـــــــــــــــــه
واللى نفسه ف عربية .. نديهـــــــا لـــــــــــه
واللى نفسه يشوف أوروبا .. نوريها لـــــــــه
واللى محتاج أى حاجة .. طب ومـــالــــــــــــه
لــــه رصيد فى البنـــك لازم .. ولعيالــــــــه
نفسى أعمل شعب مــــا شفتش مثالـــــــــــــــــه
إدى صوتك للى حالك .. زى حــــالـــــــــــه
******
الفقـــير .. بيحس دايمـــــــا .. بالغلابــــة
لما يوصف حالكوا .. حيلاقى استجابــــــــــــة
ما هو حالكم .. هو حالـــه .. صح يابـــــــــا ؟
ده اللى يستاهل .. وأولى بــــالنيابــــــــــــــــة
كل اصحاب اليوفط دول ايه ؟ .. عصابــــــــة
يعرفوكوا منين ؟ .. سؤال محتاج اجــــابــــة
الطيابة الزايدة .. بتــــلم الديــــابـــــــــــــــة
*****
قامت الدنيــــــــا .. ولا قعدتش تــــــــــــانى
واليفط نزلت جميعاً .. وف ثـــــــــــــــــوانى
انكتب فوقها كلام .. تــــــأييد عشـــــــــانى
من هنا ليوم الانتخاب .. طبل واغـــــــــانى
وكل يوم شربــــــــات مقدم للتهــــــــــــــــــانى
كونترول الحى .. بيزف امتحــــــــــــــانى
لحد يوم المعركة .. كـــله فى لجــــــــانى
شيء غريب رائع .. ما يوصفهوش لسانى
*****
والنتيجة أُعـــــلنت .. والكل صـــــــــــــــــــوت
واللى بيبوس .. واللى يحضن .. واللى عبّــــَط
واللى ترقص .. واللى شايلـــــــــــة الواد تزغرط
وامى واخواتى البنـــــــات .. الكل عيَّـــــــــــــط
والوليه مراتى .. وصْلِــــةْ ردح تنقـــــــــــــــــط
أل ولاد النـــــــدل آل فــــــــاهمين حنسقــــــــــــــــط
هه نجحنا .. يــــــــا عزول إولـــــــــع وشطشط
بس أشوف مخلوق .. مـــــا رشحناش يخبــــــط
******
والحى يسهر للصبــــاح .. ويصــــــــــــورونى
ويطوفوا بيَّـــه فى الحــوارى .. يلففــــــــــــــونى
الشــــــعب ده فعـــــلاً أصيــــــــل وصدقــــــــــــونى
لازم أشيــــله جــــوه قلبى .. وف عيـــــــــــونى
من أول الجولة .. على كتافهم .. شالـــونى
عايم على موجه بَشَر .. موكب جنــــــــــــــــونى
وصريخ هتافهم .. بالزعامـــــــــــــــة بيوصفونى
وانا فوق .. دموعى بتنحدف .. على بنطلونى
******
ورجعت بيتى الصبح .. متضحضَح تمـــــــــــام
كان نفسى أنام انشاله ســــــاعة .. مش حانـام
أصل الليلة دى الجلسة .. هى الســـــاعة كام ؟
يا خرابى لازم أترِســــم .. قوام قـــــــــــــــوام
أشحت منين بدلة .. تكون قد المقـــــــــــــام ؟
والجزمة دايبة .. بس تمشى والســــــــــــلام
فاضل قميص وشراب .. ولو ممكن حــــــــزام
ياولية اجرى اتصرفى .. " قول يـــــامدام "
******
مدام مدام .. هو احنــــــــا يعنى حنشتريها ؟
طبعاً مرات العضو .. يــــــــــا بنت السفيهه
لأ هَّى مش بُعبُع قوى .. لكن نبيهـــــــــــــــه
وأى حد يشوفها .. يحسبنى مخــــاويهــــــــــــــــــا
ولســــانها زى الحيَّة . . والناس بتداديهــــــــــــــــــا
ولـــــو حتردح ميت سنــــــة حتسـد فيــــهـــــــــــــــــــا
ولا ميت شــلق فى منتخب يقدر عــليــــــهـــــــــــــــــــا
ياما نفسى اخدها البرلمـــــان يتباركوا بيهـــــــــــــــــــا
******
واجب بقى .. نطبع كــــــــــــروت متدَّهبــــــــــــــــه
و " عضو مجلس شعب " .. واضحة ملهلبــــــــــه
الكارت ده .. يعمل عمـــــــــــــــايل مرعبــــــــــــه
له فعل زى الســــحر .. طـــــــظ ف لا حجبــــــــــه
يفتح بيبان .. كانت زمـــــــان .. متضببــــــــــــه
ويحل أعوص مشـــكلـــة .. متصـــلبــــــــــــــــــــــــه
ويعدى بينـــــــــــــــــــا البحر .. زى المركبــــــــــه
خــــــــاتم سليمــــــان جنبه أيــــــــــه فى الموهبــه ؟
*****
معقول .. حاروح البرلمان .. بالبســـــــــكليتَّه ؟
واركنها فين ؟ .. افرض بقى مـــــــــالقيتش حته؟
أخدهـــــــا جوه القاعــــة ؟ حقـــــــــــــــه تبقى نكته
غير إنهـــــــــــــــــــــــا ممكن تكرمش فى الزكتـــــه
الحاج / جمعــة .. لــــــــــــــــو يسلفنى الكاريته
كاريته أيـــــــــــــــــه ؟ ده الواد زناتى ابن ام شحته
سواق خصوصى .. عند نـــــــــــاس أخر ألسطَّه
عربية مرشيدس .. وبرضـــــــــــه الواد ده جته
******
أركب ورا ... والـــــــــــواد يسوق ع البرلمان
وفرملة .. وينزل .. ويفتح لى البيبـــــــــان
تعظيم سلام .. وانــــزل كمــــــــــا عنتر زمان
وادخل من الباب .. زى روميــــــل فى الميدان
فرحان حقيقى .. بس مش لازم يبــــــــــــــان
لا يقولوا محدث نعمة .. اتقل ياجبــــــــــــــــان
لاتهد كل الهيبة دى .. إخزى الشيطــــــــــــــــــــــــان
لازم نبان إن إحنـــــــــــا أكبر م المكـــــــــــــــــــــــــــــان
******
أنا يـــــا امه جوه البرلمـــــــــــــــــــــــان .. والقبه فوقى
وأدى المنصـــــــــــــــة .. والدكك فعــــــــــلا حقيقى
معقول أنا .. حـــــــــاقعد هنــــــــا ؟ واطلب حقوقى ؟
وربنـــــــــــــــــــــــــــــــــا الدم ابتدى يجرى فى عروقى
إدعى لى يـــــــــا أمه ربنــــــــــــــــــــــــــــا ينور طريقى
يا مصر أنا بقيت هنا .. يــــــــــــــــــــــــا مصر فوقى
راح أعملك .. أحسن بــــــلد .. على قـــــد ذوقى
سايق عليكى الأنبيــــــــــــــــــــــــــا .. تدينى شوقى
*****
يــــــا سلام على حَلف اليمين .. لحظــــــــة خشوع
قـــــلب الحــجر ينشــــــق .. يتــفــتـفــــــــت دموع
بــــاحلف لمصر الغاليــة .. أمى .. بــــالخضوع
وأكون أمين على شعبهــــــــــــا .. ولأمره طوع
وافرش بســـــــــــــتاط العدل .. فوق كل الربوع
مسئول أمــــــــــــــــــام الله .. على أمــن الجميع
يا مصر والله .. لأقيد لــــــــك العشرين شموع
واربط حزام على بطنى .. واتحمـــــــــــل وأجوع
******
أنا مش حــــاسقف .. لأ .. دانا صاحب قضية
انشا لله لــــــــــــــــو سقفت .. تتقطع إيــــــــديه
حتى إذا اتقال الكلام .. الميــــــــه ميـــــــــــــــه
ومش راح اتبســـــم .. لا حد يقول هفيـــــــــــه
ولا اســـيب وزير يصـــــــــــــــــاحبنى ويسلم عليه
حــــــافظ ألاعيبهم .. بتوع الأغلبيــــــــــــــــــة
اللعبة دى لا مؤاخذه .. عـــــــــايزه عقول ذكيه
مش أى طير .. ولا احنـــــــاش اللقمة الطرية
*****
حاستجوبك يـــــــــــــــــــــا حكومة .. لما حاشيِّبك
وحــــــــــاسمَّعك .. كـــــــل اللى مش راح يعجبك
وأعمل معـــارضــــــة م النهـــــــــــــــــــاردة وأغلِّبك
وإن مـــــــــا تعدلتيش .. عندنـــــــــا اللى يأدبك
سحب الثقة منــــــــك .. ده حقــى .. واقلبــــك
واجيب حكومة تـــــانية .. تـــــــــــــــاخد منصبك
وحاقول واقول يــــا مصر .. والله لاطربـــــــــــــك
إبنك هنــــا .. طب مين بقى راح يغلبـــــــــــــــــك؟
******
وفضلت ست شهور .. مــــافيش ولا جلسة غبت
بأجى واروح .. بــاعمل أيـــــــــــــــه ؟ أبداً تعبت
وف كل جلسة .. بـــــــــــــــاطلب الكلمة .. زهقت
والناخبين تســـــــــــــــــــألنى : قلت ؟ أقول : حاولت
وباحس إنى ف وســـــــطهم .. تلميذ وخبـــــــــت
وعمنا فوق المنصة .. يقوِّم المحــــــــــاسيب تلت
إشمعنـــــــــــا أنا ؟ قال : " قوم ياسيدى " .. اتشاهدت
ولسة حانطق .. قال لى : " شكراَّ " .. إتـــــــــــــاخدت
******
جرى أيــــــــه يـــــــــــــــــا ريس ؟ هو أنا كمالة عدد ؟
حــــــــاقعد كده مِبلِّم .. وســـــــــــــــــــــاكت للأبد ؟
قـــــام اتعَدل لى .. وانتنى لــــــــــــــى .. وانفرد
وجز طقم سنـــــــــــــــــــانه .. خــــــــد وضع النكد
( أقعد يـــــــــــــــا سيد ) .. قلت له : لا مش حاعُد
انـــــــــا عضو مجلس شعب .. فى هذا البـــــــــــلد
والشعب مصدر سلطتى .. انشــــــــــــــــال وانهبد
وراح مدقدق بالشــــــــــــــــــاكوش .. وقلبهــــا جد
******
بأقول لك أيــــــه ؟ ماتدُقليش فوق بالشـــــــــــــاكوش
وخلى بـــــالك .. احنـــا نــــاس مــــــــــــابنخافوش
شغل الخيار والقته ده .. مــــــــــــــــــــاباحبهوش
اشمعنـــــا ده .. فضل يقول .. مـــــــــــــــاقاطعتهوش ؟
وده وده وده وده .. مــــــــــــــــــــــــــــــا بطَّلوش ؟
حرام عليك .. دانـــــا دايــــرتى زى الوحـــــــــــــــــــــــوش
وعندهم تليفزيونـــــــــــــــات .. مـــــــــــــــــــــا بيرحموش
ويقول لك : الخــايبين أهـــــــم .. مــــــــــــــــــــــا بينطقوش
******
إشمعنـــــــــــــــــا يعنى .. لمـــــــــــــــــــــــا بننام نفضحونا ؟
ونلاقى روحنـــــــا .. فى الصحافــــة بينشرونـــــــــــــــــا ؟
هو انتـــــوا يعنى بس كيفكوا .. تهـــزأونــــــــــــــــــــــــا ؟
طب واحنا بننام ليــــه ؟ عشـــــــــان بتقعدونــــــــــــــــــــــــــــا
نسمع كلام فــــــــــــــــارغ .. لحد مــــــا تتعبونــــــــــــــــــا
وان قلنــــــــــا نتكلم .. مــــــا ترضوش تسمعونــــــــــــــــا
نواب أونطــــه .. والا إيـــــــه ؟ .. مــــــــــــــا تفهَّمونا
والا إحنــــــــا مش قد المقـــــــــــــــــــــــــــــام ؟ ملعون أبونا ؟
*****
وباظت الجلســــة .. وأنــــــــــــــــــــــــــا ف عز الزعامه
ولقيتنى بــــــــاتهزأ .. وتنداس الكرامـــــــــــــــــــــــــه
وناس تطيِّب للى فوق .. وتقول : لمـــــــــامــــــــــــــه
ونـــــــــاس تقول : لأ لأ .. لابــــــــــــــد من الصرامه
وهمس فى ودنى عضو .. قــــــــــــــــــــال لى بابتسامه
" يــــــــــــاعم .. خف شــــــــويه .. قوِّمت القيــــامه
حتمشى ضد الموجه .. حتروح بــــــــالسلامـــــــــــــــه
صدقنى يــــــــــا ابنى .. أنت .. فى سكــة ندامـــــه "
*****
يا عم . . أنـــــــا حـــــالف يمين .. ودى مسئوليــــة
لازم أكون .. قد القســــم .. واكتر شويــــــــــــــــــه
هو احنـــــــــا جـــــــــايين منظرة ؟ .. " حقك عليه "
لازم نقول .. ده الراعى مسئــــــــــــــــــــول ع الرعية
مش فيه مشاكل ؟ .. إيــــــــــــــــه حلولها الجوهرية ؟
" يـــــا ابنى إفهم .. إنت عقدت القضيــــــــــــــــــــة "
مش هى دى أسبـــــــــــاب وجودنا ؟ .. " أيوه هيه "
" بس امـــــــا تبقى فى البــــــــــلد .. ديموقراطية "
******
مش قالوا فيه ؟ .. " يــــــــا إبنى ما اللى يقول يقول "
قصدك تقول ؟ .. " ده كــــلام .. وضحك على العقول "
مش فيه أصول ؟ .. " حيقول لى برضه فيـــــه أصول "
لازمتنــــــــــــــــــــــــا إيه ؟ .. " يابنى فكر فى الوصول "
وصول لايــــــــــــــــــــه ؟ .. " لأ دانت كم غباء مهول "
أصبر عليه .. يـــــــاه .. دانــــــــا ف غاية الزهول
ده أنـــــــــتتا كنت فــــــــــــــاهم لما حابقى ف وسط دول
حاعمل حــــاجــــــــــات كتير قوى .. وأصول وأجول
****
يــــــــــــا إبنى روَّق .. إنســـــى .. وابدأ من جديد
فكر فى نفســـك .. إنت بـــــــــس .. إنـــت الوحيد
إيــــــه أمالك ؟ .. إيــــــــــــه طموحك ؟ .. عيش سعيد
كل مــــا توصل لهدفــــــــــــــــك .. يالا خطط للمزيد
إنت ف إيدك فرصة هايله" كى تحقق مــــــــــــا تريد "
والبلد يا عمى تغرق ؟ .. " ياابنى إنت ليــــــه عنيد ؟ "
إحنا جايين لجل نعمل .. للبلد دى .. شـــــــــــيء مفــيد
إحنا مش جايين هنا .. لا مؤخذه علشان نستـــــــــــفيد
****
إعقلها يـــــــا ابنى .. وقول لنـــــــــــا .. وحياة أبوك
حتفيد بإيه ؟ .. دول فى المشـــــــــــــــــاكل توهوك
تعمل لى فيها ثورجى ؟ .. راح يتعـــــــــــــــــــــبوك
حتمشى حالك زينــــــــا ؟ .. حينغنغـــــــــــــــــــوك
وخلى بــــــــــــــــــــــــــالك .. خدها حكمة من اخوك
يا تركب الزلاموكا .. يــــــــــــــــــــــــــا .. حيركبوك
يــــــــــــــــــــــا عم شوف نفسك بقى .. لا يزحلقوك
هما اللى يعنى .. صوتوا لـــــــــــــــــــك .. اشتروك ؟
*****
والحصانــــــــــة درع .. يحميــــــــــــــــــــــك م الرزالة
حد يرمش لــــــــــــــك بعينه ؟ .. إستحـالـــــــــــــــــــــة
مفترض إنـــــــك تكون . . صــاحب رسالــــــــــــــــــــــة
مـــــا انت صوت الشعب .. من أجل العدالــــــــــــــــــــة
والقانون ســـــــــاندك .. وحاطك جوه هالـــــــــــــــــــــة
حتى لـــــــــو كنت انت .. مســـتنقع ندالـــــــــــــــــــــــة
شعب إيه يـــــــــــــا عم ؟ .. مــا تبطل هبالـــــــــــــــــه
لـــــــــــــو وقعت فى شدة .. يرموك فى الزبالــــــــــــــة
*****
البلد بيك .. مــــــــــاشيه .. مـــــــن غيرك .. حتمشى
إنت حتحارب لواحدك ؟ .. مــــــــــــــــــــــــــــــــا تحاولشى
حد حيقول لك برافو ؟ .. مـــــــــــــــــــــــــــــــــا افتكرشى
دانت فى دنيا المصالح .. مـــــــــــــــــــــــــــــــا تقاوحشى
كله بيقول يالا نفسى .. وأمـــــــــــــــــــــــــــــــــلا كرشى
اللى جى يضحى .. لسه مــــــــــــــــــــــــــــــا أتخلقشى
إنت داخل سُخن جداً .. مـــــــــــــــــــــــا انصحكشى
هى دورة .. نعمل المليـــــــــــــــــــــــــــار .. ونمشى
****
المعنى واضح صريح .. مغزول بصوت نـــــــــاعم
حيجيبوا غيرى .. مريح .. منسجم .. فــــــــــــــــــاهم
حيقوم يسقف .. ويرجع .. ينكفى نـــــــــــــــــــــــــايم
أنا اللى يعنى فتك .. وحاغيَّر العـــــــــــــــــــــــــــالم ؟
حاولت أصون القسم .. واهو ربنا عـــــــــــــــــــــالم
وندرت روحى .. أكون للناخبين .. خــــــــــــــــــــادم
أتارينى حـــــــــــــــــــــــــــــالم .. لازم أنحنى .. لازم
عايزنى إيه .. أنتحر ؟ بالعقل يا عــــــــــــــــــــــــالم
****
أنا برضه حا خدم .. إذا .. مـــــــــــــاتيسرت خدمات
ومش راح اسكت .. حاقول لـــــــــــــكن على فترات
وحانقى أحلى كلام .. لرشاقة العبـــــــــــــــــــارات
نقاشنا للمصلحة .. ليـــــــــــــــــــــه نقلبه خناقات ؟
داحنا .. وهما .. ودكهم .. كلنـــــــــــــــــــــــــــــا إخوات
هى الحكومة عدو ؟ .. بالعكس يــــــــــــــــــــا حضرات
والله غيرها .. ما كان حيسد فى الأزمـــــــــــــــــــــــات
دا حنا علينا ديون .. من عهد أمنمحـــــــــــــــــــــــــات
****
دانا كنت رايح فى داهية .. لولا دلـــــــــــــــــــونى
واستعطفوا حضرته يـــــــــــــــــــــــــــاما .. وضمنونى
وبعد ما كان خلاص .. خطط يشيلـــــــــــــــــــــــــــونى
سامح .. وقال : "إنتهى .. خلصت " فخــــــــــــــلونى
واهى الأمور استتبت .. لمــــــــــــــــــــــــــــــا فهَّمونى
وبقيت بقول وانجلى .. طبعــــــــــــــــــــــــــاً سمعتونى
وفوق شـــــــاشـــــــــــــــــــــــــات التليفزيون بتلقونى
باظهر تماللى .. وكل النــــــــــــــــــــــــــــــاس يحبونى
*****
وركبت يــــــــــــــــــــــــــــا أمه الزالاموكا .. مكتوبه لك
تبقى إنتى أم العضو .. أيـــــــــــــــــــــــه رأيك فى ذلك ؟
ونقلنا من عطفة كرُمبه .. للزمـــــــــــــــــــــــــــــــــالك
والعزبة ميت فدان أهيه .. إزَّى حــــــــــــــــــــــــــــالك ؟
دفتر شيكات .. ومشروعات .. وكله ســــــــــــــــــــــالك
وكل يوم رحلة .. وسايح فى الممــــــــــــــــــــــــــــــالك
ولسه قدامى الطريق .. وخلى بــــــــــــــــــــــــــــــتالك
أنا اللى كنت فى العلام .. أخيب عيـــــــــــــــــــــــــــالك
****
شيء مش ظريف . . انهم فى كل الاحتفـــــــــــــــالات
بيبعتوا لنا الدعاوى .. احنا والمدامــــــــــــــــــــــــــات
ما هو اصلهم فى الحقيقة .. مــــــا يعرفوش " عدلات "
مع انى نضَّفتها .. وصرفت بالألافـــــــــــــــــــــــــــات
مكياج ولبس وحاجات .. من أشهر الماركـــــــــــــــات
بس المصيبه إنها .. مش هيئة الستــــــــــــــــــــــــات
طب أعمل إيـــــــــــــه ؟ .. مشكله .. محتاج لبنت زوات
تظهر معايــــــــــــــــــــــــا فقط .. تسترنى فى الحفلات
****
يا وليه أنا .. مش ناوى أتجوز دنـــــــــــــــــــــــــــاوه
ولا غاوى أدوَّر ع المربرب .. والحــــــــــــــــــــــلاوه
ده شيء لزوم الشيء .. حاناقشك بـــــــــــــــــالهداوه
أنا عضو مجلس شعب .. عُرضه للنقـــــــــــــــــــاوه
للوزارة .. والسياسة شغله بتربى العــــــــــــــــــداوه
لو ظهرت ف حفله بيكى يـــــــــــــــــــــــــــا بنت أوى
وانفتح بقك .. ودلدقتى الغبــــــــــــــــــــــــــــــــــــاوه
يبقى ضاع مستقبلى انــــــــــــــــــــــــا .. فى الطراوه
****
يا أمه أفهمينى .. يالَهْوِى .. .. لســــــــه مش فاهمه ؟
بقى ده كلام نعقله ؟ فكرتى بـــــــــــــــــــــــــــــالذمه ؟
يا وليه ابنك خلاص .. دلوقتى فى القمــــــــــــــــــــــة
أحط لك صورة أبويا .. فى الصالون يــــــــــــــــــــــا امه ؟
دول لو شافوها هنا .. يدونى بالصرمــــــــــــــــــــــــــــــه
ده أنا فى نظرهم كبير .ز من أسرة محترمـــــــــــــــــــــه
عايزه الجميع يعرفوا .. ان الأساس رمـــــــــــــــــــــــه ؟
أبويا كان عُصبجى .. وأمى كانت عالمـــــــــــــــــــــــه ؟
****
عايز مزاد محترم ... ألقط لى فيــــــــــــــــــــه صورتين
هانم عليها الطلا .. بيضا .. بـــــــــــــــــــــــــوش سمين
وبـــــــــــــــــــــــــــــاشا لُغده كده .. واقف جميل وتخين
والسيف فى جنبه .. وحــــــــــــــــــــــاطط قفتين نياشين
واحطهم فى الصالون .. فى بروازين غــــــــــــــــــاليين
وأقول دول أمى وأبويـــــــــــــــــــــــــــا كبار ومحترمين
من أصل تركى فخيم .. عـــــــــــــــــــــالى النسب ومتين
واحط شجرة عليتنـــــــــــــــــــــــــا .. تخزى أجدع عين
*****
أعوز بالله .. ما فيش واحد .. مــــــــــــــــــــــــــــــا بينُقِّش
وكل من هَب ماسك ريشنــــــــــــــــــــــــــــــــــــا .. بينتِّش
اللى يقول لك : سيــــــــــــــــــــــــــــــــــادة العضو بيهبش
واللى يقول لك : ظبطتـــــــــــــــــــــــه ف غُورزه بيحشش
واللى يقول لك : ده باعنا .. بعد مـــــــــــــــــــــــــا اتريش
من أين لى هذا ؟ ما تفهم قبل مـــــــــــــــــــــــــــــــا تفتش
ده ورث جدى .. وكان الوقف مـــــــــــــــــــــــــــــا اتفكش
إتحل فجأة .. أقول له : لأ مـــــــــــــــــــــــــــــــــا تتحلش ؟
*****
عــايزينى أزور دايــــــــــــــــــــــــرتى ؟ إسفخص ع الأخلاق
ده شيء من الحقد .. واضح .. إنــــــــــــــــــــــــه أصبح داء
حيجيبوا رجلى .. لفخ .. وخططوه بغبـــــــــــــــــــــــــــــــاء
زلاموكتى .. تنحشر .. جوه حوارى بـــــــــــــــــــــــــــــولاق
يهجم عليها العيال .. أشرس من الأعــــــــــــــــــــــــــــــــداء
ويجروا فوق سقفها .. زى الخيول فى سبــــــــــــــــــــــــــاق
مسمار فى ايد كل واد .. م الشنطة للســــــــــــــــــــــــواق
تدخل عروسه .. ولو خرجت .. تكون أشـــــــــــــــــــــلاء
****
توبة نصوحة .. ما ارشح روحى تـــــــــــــــــــــــانى لدول
ده أنا فى الزمالك أشــــــــــــــــــــــــاور .. مش مهم أقول
دول يركعوا كلهم .. ويقولوا : واحنــــــــــــــــــــا نطول ؟
تخدم ولاد الأصــــــــــــــــــــــــــــول .. حيقدَّروك علطول
لكن حتخدم حَوَش .. إنــــــــــــــــــــــــــــت بقى المسئول
دول ناس يا ســـــــــــــــــــــــــاتر عليهم .. مخهم مقفول
أس البلاوى جميعاً .. هو صحن الفـــــــــــــــــــــــــــــول
معقوله دول دايرتى ؟ .. طبعاً ده مش معقـــــــــــــــــول
*****

هو مش معقول ان اي عاقل يرشج نفسه للانتخابات

بجد دي مش خاطرة دي قصة واقعية

لملمت كل اللي بيحصل في المجلس

مشكور اخي عماد

اكثر من رائعة
انها كلمات تقول الحقيقة المرة للواقع فى مصر
شكراااااااااا

الانتخابات فى مصر مهزلة والقصيدة اكثر من رائعة لانها تحكى الحقيقة

قصة حقيقية
لااكثر ولااقل
شكرا على الابداع

والله كلمات رائعة وبتعكس الخيبة القوية اللى عايشين فيها اللى اسمها الانتخابات

ماشاهدناه فى انتخابات مجلس الشورى يؤكد ان المهزلة الانتخابية او بالاحرى التمثيلية
التى تدور احداثها
على ارض النيل
مازالت فى مراحلها المبكرة
شكرا اخى عماد اتمنى ان تواصل حتى ولو بعد الفاصل
ولاتحرمنا من اطلالتك الرائعة
وان اخونا النائب القادم سيقرأ هذة القصيدة جيدا
ويعى الدرس
؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟