العجوز المراهق قصة حقيقية منقولة

انا متجوزة بقالي 3 سنين ونص وكنت ساكنة في شقة بعيدة عن حماتي وحمايا وبعدين عملولنا شقة في بيتهم مع العلم انهم قاعدين في بيت تاني بس هييجوا يقعدوا هنا
معانا وجينا قعدنا فيها

المشكلة دلوقتي ان حمايا بقاله كام يوم بيقوللي كلام غريب مش قادرة افهمه

مرة جه عندنا في الشقة وجوزي راح يصلي عشان كنا بنشوفله حاجة مهمة ع النت

في الشغل بتاعه المهم لقيته لما جوزي مشي بيقوللي انا عاوز اتجوز يا .....

انا بكلمك جد والله قلتله معقوله يا عمو حضرتك بتهزر والله راح حلفلي انه بيتكلم جد وقاللي شوفيلي عروسة...
قلتله يا سلام وفضلت اضحك ومكنتش قادرة اصدقه بصراحة اصله طول عمره هو وحماتي متفاهمين جدا وعمري ما حسيت انهم مختلفين ودايما دايما بيشكر فيها ويهزر معاها

وهيا كمان بتهتم بيه قوى ده طبعا في حدود اللي انا عارفاه يعني الظاهر واللي بشوفه قدامي
واللي جوزي بيحكيلي عليه ..
المهم قاللي شوفيلي عروسة طويلة كده وحلوة زيك قلتله ربنا يخليك يا عمو

بس الطول مش كل حاجة.. راح قاللي نفسي في واحده طويلة اروح واجي معاها وعاوز واحدة تدلعني كده زيك وبعدها قاللي يعني انتي ترضي بيا لو كنت اتقدمتلك ...

رحت ضحكت .. انا بستهون بالموضوع او مش مصدقة اصل يا جماعة ده راجل متدين جداا

وكمان محترم ومنصبه عالي جدا في الدولة وكل الناس بتحترمه مكنتش عارفه اقله ايه..

المهم بيقوللي والله انتي زي القمر قلتله ربنا يخليك طيب قول لابنك انا كنت بحاول افوقه

حسيت الموضوع خد مغزي تاني خالص فضل يقوللي انا مش عاوز الكلام ده يطلع بره انا بثق فيكي وانا عاوز واحده اصاحبها واحنا نبقي صحاب انا طبعا خدت الموضوع ع المحمل الكويس قلتله.. طبعا يا عمو
سرك في بير بس انت والله عمرك ما تلاقي ضفر ماما اللي هيا حماتي..

راح قاللي طيب بلاش جواز عشان مزعلش ماما وعشان مكانتي في الشغل خلاص ايه رأيك تبقي صحبتي..
برضه مفهمتوووووووووووش قصدي مش عاوزة افهمه .. فضل يقوللي نقرا الفاتحة اننا نكون اصحاب ومتقوليش ل ..... اللي هو جوزي عشان الثقة يعني وقاللي خلاص لما اجي هنا نبقي صحاب..
انا كنت مصدومة وبحاول اخد كلامه بحسن نية وانه عاوز يفضفضلي بس مش بيعاكسني يعني..

وبعديت قاللي اي حاجة عاوزاها تقوليهالي وانا اي حاجة هعوزها هقولهالك برضه

ولقيته بيقوللي بقي المفاجأة واحنا قاعدين قدام الكمبيوتر انتوا بتتفرجوا علي ايه انتي و ... جوزي يعني

قوليلي بس طيب مش عاوزة تفرجيني انا هتفرج عندنا لما ادخل نت.. كلام غريب

انا اتكسفت قوى ومن كسوفي ضحكت وقلتله احنا مش بتوع الكلام ده يا عمو ده حراااام

والله انا محتارة قوى فيه ومصدومة من كلامه ده..

يا جماعة هو كان كويس ومفيش اي حاجة غير ممكن مثلا مرة يقوللي ايه الحلاوة دي وخلاص كده او يقوللي عاوز اتجوز وميعيدهاش كده يعني

المهم تاني يوم جه كنت نايمة وجوزي كان معاه لما صحيت سلمت عليه لقيته بيقوللي وحشتينا يا ....

وبعدها مشي وفي وقت الصلاة اتصل عشان عارف ان جوزي في المسجد ولقيته بيقوللي انا كنت مستنيكي تطلعي وكنت هدخل اصحيكي بس مرضتش اعمل كده وانتي مبتسأليش عليا ليه وانا هجربك اسبوع مش اتفقنا نكون صحاب ..واي حاجة تعوزيها تطلبيها مني اصله معاه فلوس واحنا لسه في بداية حياتنا وبيبخل علي ابنه جداا
وفي الاخر قاللي متقوليش ل ... اني اتصلت.. انا مستغربة ازاي يحط نفسه في موقف زي ده طول عمره قوى وبيحب ولاده جدا ومسيطر كمان عليهم ...

انا تعبانة بجد من اللي حصل ده ومش عارفه اتصرف ازاي ومش عاوزة الموضوع يتطور

ومش عاوزة مشاكل ..
نسيت اقلكم انا قلت لجوزي بس جوزي غلبان وعاقل المهم قاللي ايه نجوزه احسن شفتوا؟

بيقوللي نشوفله عروسه عشان امي كبرت وهو محتاج واحده تدلعه قلتله بس ده حرام انا مجيش علي ماما ومتسببش في خراب بيتها ..

كان متردد بس هو متضايق عشان ابوه عمره ما كان كده وحاسس انه ناقصه حاجه
وصعبان عليه وهو كمان مش مصدق والله عشان تعذروني..

المهم قاللي حاولي متتكلميش معاه كتير وتاخدي معاه موقف بس ازاي بس ده راجل قد ابويا انتوا حاسين بيا طول عمره معروف عنه انه محترم وبعدين كلامه برضه مش واضح
يمكن انا فهمت غلط انا بكدب نفسي والله

بس جوزي كمان لما حكيتله مكانش قادر يحدد هو عاوز عروسة ومراهق ولا عاوز حاجة تاني مني؟؟؟؟ وانا حلفته ما يعرفه حاجه ولا يحسسه حتي ولا يقول لحد.. وبعدها قلتله
يمكن عاوزنا نسيب البيت قاللي لو كده نمشي من الصبح وبعدها قاللي مكنش جابنا هنا وفضل يتحايل عشان نيجي طيب وبعديين؟؟

ارجوكم تجاوبوني بردودوكم انا محتاجاها جدا انا متضايقه عشان حمايا وعشان جوزي
وعشان حماتي كمان ومش عاوزة مشاكل انا خايفة لما ييجوا يسكنوا هنا الموضوع يتطور عنده
ومش عارفه لو اتصل بيا تاني اقله ايه؟؟؟

لاحول ولاقوة الا بالله هو حصل ايه فى الدنيا ؟؟؟؟؟؟؟؟؟؟؟؟؟؟؟

» افكار للتعامل مع المراهق
» العجوز والمنشار
» العجوز والعقرب